Багайдагы фельдшер-акушерлык пунктында ремонт төгәлләнде

Быел Арыслан, Багай, Салтыйган, Корноухово, Кече Подберезье, Соравыл, Федоровское, Шуширмә, Морза Бәрлебашы, Байморза авылларында фельдшер-аку­шер­лык пунктларын ремонтлау өчен республика бюджетыннан йө­зәр мең сум акча бүлеп бирелде. Узган ел да ун пункт ремонтланган иде.

Әле шушы араларда гы­на Багай авылындагы фельдшер-акушерлык пунктында ремонт төгәл­ләнде. Ул мә­дәният йорты бинасына урнашкан.

- Мин 210 кешегә медицина хезмәте күрсәтәм. Учас­токта балалар саны аз, дип булмый. Мә­сәлән, бездә мәктәп­кәчә яшьтәге - 23, ундүрт яшькә кадәрге - 53, 18 яшькә кадәрге 61 бала бар. Быел өч бала туды, аларның сәламәтлеген өйләренә барып тикше­рәм. Демографик хәл тагын да яхшырсын иде дә бит. Физик мөмкинлекләре чикле булган 14 кешенең җидесе ташламалы шартларда дарулар ала, ягъни соцпакеттан файдалана. Авыруларга беренче медицина ярдәме күр­сәтү өчен бездә бөтен шартлар да бар, - ди фельдшер-акушерлык пункты мөдире Эльмира Уразова.

Эльмира үзе Яшел Үзән районының Танай авылыннан, бирегә көн саен биш чакрымнан килеп эш­ли. Монда үз кешегә әй­ләнгән инде ул, чөнки күр­шедәге Арыслан авылында тугыз ел эшләгән, Багайда эшли башлавына да алты ел.

- Язгы, көзге пычракларда, кышкы бураннарда да эшенә килми калганы юк аның. Халык яратып өлгерде үзен, әбиләр дә, авырмасалар да, киңәш сорап еш килә. Барысын да якты йөз бе­лән каршы ала. Ремонт вакытында да бинаны үзе җыеш­тыр­ды. Тормыш иптәше Илдар да килеп булышты, ягулык системасына торбаларын үзе табып алып килеп, эретеп ябыштырды, - ди Багай авыл җирлеге башлыгы Рушания Кузнецова.

Төзүчеләр биредә стеналарны гипслы картон бе­лән тышлаган, бүлмә­ләр­не ремонтлаган, тү­шә­мен дә заманча, асылмалы итеп эшләгәннәр. Ишек алыштырырга, идәнгә ленолиум җәергә җитәрлек акчаны авыл җирлеге биргән.