Хөрмәтне көч белән түгел, эш белән яуларга

ТР эчке эшләр органнары ветераннары Со­веты 1991 елда ук оеша. Аның бурычларының берсе - эчке эшләр системасында хезмәт иткән ветераннарны бергә туплау, ветераннар хәрәкәтен оештыру һәм яшь хезмәткәрләргә хез­мәт тәрбиясе бирү. Бүген Кайбыч ветераннар оешмасында 12 кеше исәпләнә. Иминлегебезне саклауга хезмәт иткән өлкән буын әле хәзер дә эшсез утырмый: даими оештырылып килгән утырышларда актуаль мәсьәләләрне уртага салып сөйләшәләр, тәҗрибә уртаклашалар. Хокук саклау кебек җаваплы һө­нәрне сайлаган яшьләргә ярдәм итәргә дә теләкләре зурдан. Сүз уңаеннан, бүлекчәдә яшь белгечләр Советы актив эшли. Яше 30га тулмаган хезмәткәрләрне үзенә туплаган бу оешманың җитәкчесе - ЮХИДИ инспекторы Илфат Әх­мәтов.

"Дальний" полиция бүлекчәсендә булган мәгълүм вакыйгалардан соң, ветераннар яшь хокук сакчылары белән аралашып, фикерләрен җиткерергә карар кылган. Совет рәисе, отставкадагы подполковник Ленар Закиров билгеләвенчә, Татарстанның Эчке эш­ләр министрлыгы һәрвакытта да үрнәк булды. "Дальний" бүлекчәсенең җавапсыз хезмәткәрләре исә үзләренә генә түгел, җитәкчелеккә дә зыян китерде. Аксакалның иманы камил: полиция хезмәткәре һәр эштә үрнәк күрсәтергә, яшәешнең бар өлкәләреннән хәбәр­дар булырга, һөнәренең җаваплылыгы хакында бер генә минутка да онытмаска тиеш. Эш күрсәтеп хөрмәт яуласын иде яшь­ләр, дип сыкрана ветеран. Үзенең хезмәт тәҗ­ри­бәсе - шуның ачык мисалы. Ленар Закировка үз гомерендә куркыныч җи­наятьчеләр белән күзгә-күз очрашырга да, катлаулы җинаять эшләрен тик­шерергә дә туры кил­гән. "Полиция хезмәткәре һөнәрен сайлагансыз икән - аны ахырынача лаеклы рәвештә үтегез!" - диде хөрмәткә лаек ветеран, яшь хезмәттәшләренә ки­ңәшләрен биреп. Дуслары - ветераннар Рифкать Гайнуллин белән Николай Иванов та аның белән тулысынча килештеләр.

Россия Эчке эшләр министрлыгының "Апас" муниципальара бүлеге на­чаль­нигы Рамил Хәбибуллин да яшь белгеч­ләрләргә өлкән остазларыннан үрнәк алырга киңәш бирде. Чынлап та, офицер исеменә тап тө­шер­мичә, һөнәренә тугрылык саклап хезмәт ит­кән ветераннарның эш тәҗрибәсенә таянып, дә­реслекләр язарга мөмкин булыр иде. Ильфат Әхмә­тов аларга яшь белгечләр исеменнән рәхмәт әйтеп, «Кайбыч» полиция бүлекчәсенең горур традицияләрен дәвам итәчәкләрен белдерде.