Автомобиль хуҗалары ягулыкның сыйфатын визуаль яки ис буенча билгели алмыйлар.
Нормадан тайпылышларны еш кына двигатель югары йөкләнешләр һәм характерлы металл яңгырау белән эшли башлагач кына тоеп була. Бу хакта "Татар-информ«га автоэксперт, «За рулем» журналының баш мөхәррире Максим Кадаков хәбәр итте.
«Бензин күп төрле параметрлар буенча таләпләргә җавап бирмәскә мөмкин, мәсәлән, составында күкерт, бензол яки ароматик углеводородлар күп булырга мөмкин. Двигатель берникадәр вакыт тигез эшләячәк, ләкин бу вакытта каталитик нейтрализатор җимерелә башлаячак яки ламбда-зондлар сафтан чыгачак. Бу тупланма агу кебек: шунда ук берни дә сизелми, әмма төеннәр ресурсы кискен кими», — дип аңлатты Максим Кадаков.
Ягулык белән проблемаларны тутырылган бензинның октан саны белдерелгәннән шактый түбәнрәк булган очракта гына сизәргә мөмкин. Бу очракта мотор эшләгәндә характерлы детонация тавышы барлыкка килә.
Шул ук вакытта эксперт ассызыклаганча, заманча автомобильләр сыйфатсыз ягулыкны узган буын машиналарына караганда күпкә начаррак кичерә.
«Заманча моторлар катлаулы электрон системалары һәм датчиклар аркасында бензин сыйфатына бик сизгер. Утыз ел элек булган автомобильләрдән аермалы буларак, катлаулы техника ягулык составындагы тайпылышларга күпкә тизрәк җавап бирә», — дип билгеләде автоэксперт.
Кадаков тикшерелгән челтәр АЗСларына ягулык салырга һәм сатып алучының һәр килгән ягулык партиясенә сыйфат паспорты эленгән почмагына игътибар итәргә киңәш итте. Документта экология классы (мәсәлән, К5/Евро-5) һәм партиянең факттагы химик күрсәткечләре күрсәтелә.
Нет комментариев