«Зөя буе татарлары» конференциясе Кайбычта үз эшен тәмамлады

Бу хакта Бөтендөнья татар конгрессының матбугат хезмәте хәбәр итә.

Иртән делегацияне Олы Подберезье авылында каршы алдылар. Программа кысаларында катнашучылар ачык һавада урнашкан уникаль «Икмәк музеенда» булды, анда төбәкнең авыл хуҗалыгы тарихы һәм ипи пешерү традицияләре белән таныштылар.

Аннары делегация Олы Кайбыч авылына юл тотты. Анда конференция делегатлары ике әһәмиятле мәдәни мирас объектын — «Туган як» туган якны өйрәнү музеен һәм мәшһүр татар җырчысы, РСФСРның халык артисткасы Галия Кайбицкаяның музей-йортын карады. Галимнәр музей экспозицияләрендәге материалларның фәнни эшләрдә һәм төбәк тарихын язуда нинди ярдәм күрсәтүе турында фикер алышты.

Төп фәнни чара район Мәдәният йорты бинасында дәвам итте. «Зөя буе татарлары» конференциясе — ул Россия төбәкләрендә яшәүче татарларны тарихи елгалар буенча берләштерүгә юнәлдерелгән уникаль проект.

Мондый экспедицияләр 2030 елгы җанисәп алдыннан милләттәшләребезнең яңа тарихын барлау өчен кирәк. Зөя — Евразия континентында, Иделгә каршы ага торган бердәнбер елга. Конференция кысаларында әлеге елга буенда гомер итүче татарларның тормышы, гореф-гадәтләре һәм тел үзенчәлекләре өйрәнелә.

Фәнни өлештә Татарстан Фәннәр академиясенең Тарих, Археология, Тел, әдәбият һәм сәнгать институтларыннан килгән белгечләр докладлар белән чыгыш ясады. Алар Зөя елгасы бассейнында яшәүче татарларның этник составы, борынгы каберлекләрнең казылмалары һәм халык авыз иҗаты үрнәкләре турында яңа мәгълүматлар җиткерде.

Искәртеп үтәбез, конференция Ульяновск өлкәсендә башланып, Буа районында дәвам иткән иде. Кайбычтагы эш көне — өч көнлек экспедициянең соңгы этабы булды. Чара нәтиҗәләре буенча фәнни җыентык бастырып чыгару һәм «Зөя буе татарлары» дигән документаль фильм төшерү ниятләнә.

Фото: Бөтендөнья татар конгрессы матбугат хезмәте

Чыганак: «Татар-информ» https://tatar-inform.tatar/news/zoya-bue-tatarlary-konferenciyase-kaibycta-uz-esen-tamamlady-5930055