«Миләшкәй»нең иң яхшы тәрбиячесе

Бәйгенең беренче турында "Визит карточкасы"н тәкъдим итеп, педагоглык эшчәнлекләре белән таныштырдылар, ул актуальлек һәм нәтиҗәлелек ягыннан бәяләнде. Икенче турда тәрбиячеләр үз эш тәҗрибәсенә һәм дә­ресләргә бәя бирде. Монда балаларны иҗади активлыкка, сәләтләрен күрсәтүгә этәрүче ысулларны куллана белүләренә игътибар юнәлтелде. Шул ук вакытта тәрбияви кыйммәтләр һәм заманча инновацион программа, технологияләр­дән файдаланып эшләү дә тиешле бәясен алды. Өченче тур аеруча мавыктыргыч, җанлы узды: "Иҗа­ди бәйге"дә тәрбиячеләр әзер эшләнмәләргә гжель, хохлома, городец кебек дөньякүләм билгеле традицияләрдә рәсем­нәр төшерде. Өстәвенә, бәйгедә катнашучыларга "Тәрбияче - иҗади шә­хес" дигән темага өй эше әзерләргә кушылган иде. Монда тәрбиячеләр үзлә­рен төрле яктан күрсәтте, биеде, җырлады, кул эшләре белән таныштырды. Җиңүчене ачыклау җи­ңелләрдән булмады, әл­бәттә. Балалар бак­часы мөдире Венера Сафиуллина, аның тәр­бия-методик эш буенча урынбасары Альбина Якупова һәм мәктәпкәчә белем бирү учреждениеләренең район методик берләшмәсе җитәкчесе Гөл­наз Гыйбадиевалардан торган жю­ри объектив бәя­сен бирде. Икенче кече төркем тәрбиячесе Светлана Әүхәтшина ел­ның иң яхшы тәрбиячесе дип табылды. Икенче урында өлкән төркем тәр­биячесе Гөлназ Гарапова, өченчедә - беренче кече төр­кем балаларының апалары Светлана Муклукова. "Җиңүгә омтылышы өчен" номинациясендә әзерлек төркемен­дә эшләүче Гөл­генә Җи­һаншина белән иң кечкенәләрнең тәрбиячеләре Альбина Сибгатуллина җиңүчеләр дип билгеләнде. Аларга Мактау кәгазьләре, истәлекле бүләкләр тапшырылды.