Кайбыч таңнары
  • Рус Тат
  • Мәлкинең яшь спортчылары самбо белән шөгыльләнә башлады

    Әле кайчан гына бадминтон, тимераякта шуу безнең өчен яңалык булса, хәзер инде алар буенча аерым уңышларыбыз да бар. Ә быел яшь спортчыларыбыз самбо белән шөгыльләнә башлады.

    11 февральдә Мәлки авы­лындагы күпфункцияле үзәктә атаклы самбочылар нәселенең бер вәкиле - Рәфыйк Мадьяров Казан шәһәрендәге "Батыр" кө­рәш сараенда шөгыльләнүче укучыларын алып килде. Мәлки - кө­рәшчеләр төбәге. Монда Кече Мәмедә татар-башкорт милли көрәшен үз итеп өлгергән Сергей Козин һәм Валерий Фомин да чыкырылган иде.

    - Без гаиләдә алты егет, биш кыз үстек. Олы абыебыз Фәрит Казанда самбо белән шөгыльләнә иде. Ул безне - энеләрен дә спортның шул төренә алып кереп китте. Мин 1969 елда самбо белән шөгыльләнә башладым. Самбо - дисциплина та­ләп итә.1982 елда Советлар Союзы күләмендә үткәрелгән ярышта призлы урын яуладым. Шул ук елны Париж шәһә­рен­дә үткән самбо буенча дөнья чемпионатында икенче урынга чыктым. 1983 елда Испаниядә дөнья чемпионатында үз авырлыгымда чемпион калдым. Шуннан бирле самбоны ташлаганым юк. Хәзерге вакытта республикабыздагы самбо федерациясенең вице-президенты булып торам. Президенты - сезгә ях­шы таныш булган Иван Егоров. Казанда, Биектау, Кукмара, Саба, Чистай районнарында самбо тү­гә­рәкләре эшләп килә. Иделаръягы районнарында самбо секциясе ачып җибәрү максаты белән Кайбычка килдек, - дип үзе белән таныштырды Рәфыйк Мадьяров.

    Кунаклар буш кул белән килмәгән. Алар балаларга самбо белән шөгыль­ләнү өчен махсус тегелгән, төрле үлчәмдәге унбиш комплект курт­калар бүләк итте. "Батыр" көрәш сараенда самбо буенча тренер Булат Кадыршин үзе кул астында шөгыльләнүче егетләр белән мастер-класс үт­кәрде. Мәлкидә дә самбо белән шөгыль­ләнергә теләк белдерүчеләр табылган. Бу көнне егермегә якын укучы кил­гән иде. Алар арасында кызлар - Яна Митачкина, Анна Бичарина, Анастасия Заказова, Лиана Ан­дреева да бар.

    - Узган ел Анастасия Заказова, Анна Бичарина Мамадыш шәһәрендә ирекле көрәш буенча үт­кән республика ярышларында катнашып, үз үл­чәү авырлыкларында дүр­­тенче, алтынчы урыннарга чыккан иде, - диде Мәлки төп мәктәбенең физкультура укытучысы Александр Галкин.

    - Укучылар беренче кү­некмәләрне алды. Хәзер тренерлары ярдәмендә осталыкларын арттырырлар. Республикада самбо буенча ярышлар үткәндә егетләрне тәҗрибә тупларга алып барачакбыз. Киләчәктә безнең яшьләр арасыннан да яхшы спортчылар чыгар, дип өметләнәм, - диде район яшьләр эшләре, физкультура һәм спорт бүлеге начальнигы Юрий Михайлов.


    "Спортның самбо төрен халык арасында популярлаштыру өчен аңа балаларны 5-7 яшь­тән үк тарта башларга кирәк. Хәзерге вакытта бу юнәлештә шактый эш башкарылды ин­де," - диде Рәфыйк Мадьяров.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: