Сәламәт яшәү рәвешен сайлыйк
Авыл җирлекләрендә халыкны спортка тарту максатында спартакиада кысаларында спортның биш төре буенча ярышлар үткәрдек инде. Шунысын әйтергә кирәк, даими катнашучы командаларның һәм спортчыларның арта баруы районыбыз җитәкчелегенең яшьләр сәясәте, физкультура һәм спорт бүлеге белән берлектә дөрес юлдан баруын күрсәтә.
Райондагы унҗиде авыл җирлеге арасыннан бары Надеждино авыл җирлегендә генә (башлыгы Надежда Жиренкова) төрле спорт чараларында катнашуны кирәксенмиләр. Аларның ярышларда бер тапкыр да катнашканы булмады. Сәбәпләре дә бардыр, әмма биредә төп сәбәп - авыл җирлеге җитәкчелегенең халык белән эшләргә теләмәве, спортка, авыл җирлегенә кергән авыллардагы яшьләргә игътибар бирүне кирәксез эшкә санаулары дип аңларга була.
Спартакиадада актив катнашучы авыл җирлекләрен дә әйтү урынлы булыр дип саныйм. Үткән биш ярышның өчесендә җиңү яулап, зур өстенлек белән алда баручы Мәлки авыл җирлеге (башлыгы Артем Козлов) лидерлыкны үз кулында нык тота. Икенче-өченче урыннарда Иске Тәрбит (Виталий Тимофеев), Хуҗа Хәсән (Светлана Матвеева) авыл җирлекләре. Спартакиада, спортның барлык төрләрен дә диярлек үз эченә алып, ел дәвамында барачак. Чираттагысы - 14 апрельдә район оешу көненә багышлап, милли көрәш буенча булачак. 24 апрельдә ир-егетләр һәм хатын-кызлар катнашында гер күтәрү һәм кул көрәштерү ярышлары үткәрү күздә тотыла. Җир кипкәч, футбол, волейбол буенча, гаиләләр арасында спорт ярышлары үткәрү планлаштырыла. Районыбызның барлык спорт сөючеләрен әлеге ярышларда актив катнашырга чакырабыз. Ярышларда катнашу, гомумән, кызыксындырган барлык сорауларыгыз белән 2-15-66, 89274078962 телефоннары аша район яшьләр сәясәте, физкультура һәм спорт бүлегенә мөрәҗәгать итә аласыз. Вакытны файдалы, яшәү рәвешебезне күңелле итеп үткәрү үзебездән торуын онытмасак иде.
Иң мөһим һәм кызыклы язмаларны Татмедиа Telegram-каналында укыгыз
