Кайбыч делегациясе «АгроВолга—2026» халыкара күргәзмәсендә катнашты

Барлыгы егермедән артык делегат катнашты. Чара «Казан Экспо» халыкара күргәзмә үзәгендә узды. Ул аграр бизнес вәкилләрен, дәүләт хакимияте органнарын, фәнни җәмәгатьчелекне, тармак берләшмәләрен, тәэмин итүчеләрне, инвесторларны һәм авыл хуҗалыгы товарлары җитештерүчеләрне бер мәйданга җыйды.

Өч көн дәвамында күргәзмә комплексы һәм тәҗрибә басулары һөнәри аралашу, заманча технологияләрне тәкъдим итү, агросәнәгать комплексын үстерүгә кагылышлы актуаль мәсьәләләр турында фикер алышу һәм яңа эшлекле элемтәләр урнаштыру мәйданына әйләнде.

Күргәзмә эшендә Россиянең 38 төбәгеннән 400дән артык компания, шулай ук Кытай, Белоруссия һәм Төркиядән вәкилләр катнашты. Өч көн эчендә күргәзмәне Россиянең 59 төбәгеннән һәм дөньяның 19 иленнән 12 меңнән артык белгеч карады. Кунаклар арасында агрохолдинглар һәм фермер хуҗалыклары җитәкчеләре, эшкәртү предприятиеләре вәкилләре, техника һәм технологияләр белән тәэмин итүчеләр, профильле экспертлар, белем бирү оешмалары һәм дәүләт хакимияте вәкилләре бар иде.

«АгроВолга» экспозициясе хәзерге агросәнәгать комплексының төп юнәлешләрен колачлады. Компанияләр үсемлекчелек, терлекчелек, авыл хуҗалыгы техникасы һәм аның комплектлаучы детальләре, агросәнәгать комплексын цифрлаштыру, авыл хуҗалыгы продукциясен саклау һәм эшкәртү, аграр төзелеш һәм инфраструктура үсеше өлкәсендәге заманча карарларны тәкъдим итте.

Күргәзмәдә катнашучылар заманча технологияләр белән танышу, базар тәкъдимнәрен чагыштыру һәм төрле күләмдәге хуҗалыклар өчен кулай булган чишелешләрне сайлап алу мөмкинлегенә ия булды.

Быел беренче тапкыр «Агротуризм» һәм «Махсус техника» бүлекләре тәкъдим ителде. «Агротуризм» бүлеге авыл җирендә эшмәкәрлекнең яңа формаларын үстерүгә, туристик инфраструктура булдыруга, фермер хуҗалыкларын үстерүгә һәм авыл хуҗалыгын эчке туризм белән берләштергән проектларны гамәлгә ашыруга багышланды.

«Махсус техника» бүлегендә агросәнәгать җитештерүенең төрле юнәлешләре өчен машиналар һәм җиһазлар күрсәтелде.

Төрле сортларны сынау полигонында ашлык, терлек азыгы, майлы, техник һәм кузаклы культураларның якынча ике йөз перспективалы сорты­ һәм гибриды тәкъдим ителде. Кунаклар заманча агротехнологияләрнең нәтиҗәләрен җитештерү шартларында бәяләү, төрле ашламалар һәм үсемлекләрне саклау чараларының нәтиҗәлелеген чагыштыру, авыл хуҗалыгы культураларын үстерү технологияләре белән танышу һәм җитештерү эшчәнлегендә кирәкле практик мәгълүмат алу мөмкинлегенә ия булды.

Күргәзмәнең иң әһәмиятле вакыйгаларының берсе — сөт юнәлешендәге нәселле терлекләрнең VI республика конкурсы-күргәзмәсе — «АгроВолга гүзәле» булды.

Программаның тагын бер күркәм чарасы — газ-мотор ягулыгында эшләүче «Беларус» тракторларын профессиональ йөртү буенча «МТЗ-ШОУ» республика чемпионаты булды. Ярышларда Татарстан Республикасының 42 механизаторы катнашты. Алар арасында Кече Кайбыч авылыннан якташыбыз, югары уку йорты студенты Булат Зиннуров та бар иде.

Механизаторлар үзләренең югары һөнәри осталыкларын, техниканы төгәл идарә итү сәләтләрен һәм катлаулы практик биремнәрне үтәү күнекмәләрен күрсәтте.

Чемпионат механизатор һөнәрен популярлаштыру, тәҗрибә уртаклашу һәм заманча авыл хуҗалыгы техникасының мөмкинлекләрен күрсәтү мәйданы булуын тагын бер кат раслады.

Күргәзмә кысаларында мөгезле эре терлекләрнең тоякларын кисү буенча халыкара студентлар спартакиадасы беренче тапкыр үткәрелде.
Бизнес, фән, тармак берләшмәләре һәм дәүләт хакимияте вәкилләре катнашында узган 70тән артык чараны үз эченә алган киң колачлы эшлекле программа күргәзмәнең аерылгысыз өлеше булып торды.

Катнашучылар заманча технологияләрне кертү, агросәнәгать комплексын цифрлаштыру, дәүләт ярдәме механизмнарын камилләштерү, кооперацияне үстерү, авыл хуҗалыгы җитештерүенең нәтиҗәлелеген арттыру һәм тармак алдында торган актуаль мәсьәләләргә гамәли чишелешләр табу буенча фикер алыштылар.

Ачык һөнәри диалог форматы эксперт бәяләмәләрен, практик тәҗрибәне һәм илнең агросәнәгать комплексын алга таба үстерүгә юнәлтелгән тәкъдимнәрне берләштерергә мөмкинлек бирде. «АгроВолга» күргәзмәсе илнең иң мөһим тармак мәйданчыкларының берсе булуын тагын бер кат раслады. Биредә яңа эшлекле элемтәләр урнаша, халыкара хезмәттәшлек ныгый, агросәнәгать комплексының үсеш перспективалары турында фикер алышына һәм Россия авыл хуҗалыгын алга таба үстерүгә ярдәм итә торган карарлар кабул ителә.

Материал ТР Авыл хуҗалыгы һәм азык-төлек министрлыгы сайтыннан алынды