Кайбыч таңнары
  • Рус Тат
  • Могҗизалы Чыршы бәйрәмендә

    Шимбә көнне балалар сәнгать мәктәбе бинасында узган Чыршы бәйрәменә туганнары тәрбиясендә яшәүче балалар һәм республиканың төрле балалар йортларыннан тәрбиягә алынган ятимнәр җыелды.

    Урман гүзәле - яшел чыр­шы тирәли әйлән-бәй­лән әйләнүче бу балаларга карап, сокланмаган кеше булдымы икән?! Кызларның кайсы ефәк купшы күлмәкләрдән, төрле әкият геройлары булып киенүчеләре дә бар. Малайлар да алардан калышмаган: матур костюмнардан килгәннәр. Районның төрле авылларыннан җыелган балаларны башта "Өмет" халыкка социаль ярдәм күрсәтү үзә­генең гаилә һәм балалар белән эшләү бүлегендә тәмле ризыклар белән сыйладылар.

    Район башкарма комитеты җитәкчесе Алексей Ма­каров, бәйрәм кунакларын район башлыгы Җәү­дәт Гаффаров исеменнән якынлашып килүче Яңа ел бәйрәме белән котлап, ата-ана назыннан мәх­рүм калган балаларны үзләренең җылы ояларына алучыларга ти­рән рәх­мәтен белдерде. Бүгенге көндә безнең районда 13 гаилә балалар йортларында үскән 24 ятимне үз баласыдай күреп тәрбияли. Ә 28 бала опекун гаилә­сендә - якыннары тәрбиясендә үсә. Башкарма комитет җитәкчесенең социаль мәсьәләләр буенча урынбасары Рамилә Айзатуллова да аларга эчкерсез тәбрикләүләрен җиткерде. Опека һәм попечительлек бүлеге хезмәткәрләре дә биредә иде. Район социаль яклау бү­леге начальнигы Фатыйма Бикбова әйтеп узганча, ятимнәргә ярдәм итү - район җитәкчелеге эшчәнлегенең өстенлекле юнәлешләреннән берсе.

    Тәбрикләүләрдән соң Яңа ел тамашасы башланып китте. Аны музыкаль-театральләштерелгән тамаша рәвешендә әзерләгәннәр. Балалар үзләре дә Кыш бабай белән Кар кызына шигырьләр сөйләде, җырлап-биеп күрсәтте. Капчыгы зур иде бабакайның, бүләкләрне мул­дан өләште. Кыш бабай, Кар кызы үзләре дә матурланган: өр-яңа костюмнар кигәннәр. Әкият геройларына охшатып киенеп килгән барлык балаларга да аерым бү­ләкләр тараттылар. Бәй­рәм ахырында исә һәр­берсенә тәм-том туты­рыл­ган пакетлар өләш­теләр. Ху­җа Хәсән­нән кил­гән Любовь Лобурь оныгы Лаураны карап үс­терә Ул әлеге чараны оештыручыларга ти­рән рәхмәтен белдерде.

    Чыршы бәйрә­мендә катнашучыларны урамда сюр­приз көтә иде. Төрле төс­ле салют аттылар. Яңа ел салюты. Бу җи­һан­га бәхет өчен туган балаларның барысының да тормышы әнә шундый гүзәл могҗизаларга бай булсын иде.

    Нравится
    Поделиться:
    Реклама
    Комментарии (0)
    Осталось символов: