Нәтиҗәле хезмәт

Табигатьнең иң матур чагында Иске Тәрбит авылында Марфа апа белән Михаил Зайцевларның күп балалы гаиләсендә 1962 нче елда унынчы бала булып дөньяга кил­гән ул. Әтисе Михаил Зайцев озак еллар Иске Тәр­бит мәктәбендә укытучылык иткән: башта башлангыч сыйныфларда, ан­нары математика фә­нен­нән тирән белем бир­гән.

Юрий Михайлович та, мәк­тәпне уңышлы тәмамлагач, әтисе юлын сайлый. 1982-1984 нче елларда Әлмәт физкультура техникумында белем ала һәм хезмәт юлын Иске Тәрбит урта мәктәбендә укытучы булып башлап җибәрә. 28 ел, бу һөнә­рен­нән бер адым да чит­кә тайпылмыйча, физкультура һәм ОБЖ фәннә­реннән белем бирә.

Юрий Михайлович - районның тәҗрибәле педагогларының берсе. Ул үз эше­нең чын остасы. Юморга бай, мәзәкчән тел­ле, туры сүзле, оптимист укытучыны укучылар да якын күрә. Ул оештырган түгәрәкләргә теләп йөриләр, район күләмендә үткәрелгән олимпиадаларда призлы урыннар яулыйлар. Мәк­тәбебез спорт буенча гел алдынгылар рәтендә. Өч дистәгә якын ел эчендә ничәмә-ничә ярышларда, бәйгеләрдә катнашылган. Аларда яуланган Мактау кәгазьләренең исәбе дә санап бетергесез. Гомер юлын, намуслы хезмәткә багышлаган укытучыны ата-аналар да хөрмәт итә.

Юрий Михайлович - бер дигән гаилә башлыгы. Тормыш иптәше Галина Николаевна белән, бер-берсенә ярдәм итешеп, бер-беренә терәк булып, күпләрне сокландырырлык итеп яшиләр, өч ба­ла тәрбияләп үстерәләр. Олы улы Вадим - шофер, МЧС хезмәткәре, кызлары Елена Казан дәүләт мәдәният һәм сәнгать университетының 2 нче курс студенты, кече кызлары Мария 6 нчы сыйныфта белем ала.

Укытучының хезмәтенә иң югары бәя - өметләрнең аклануында. Килә­чәк­тә барлык теләк-омтылышларың чынга ашсың. Гаиләңә дә, эшеңдә дә һәрчак шулай кадерле булып кал.