Бәйге – авылдаш истәлегенә

Ярышны ачу тантана­сын­да спонсорлар - абыйлы-энеле Гомәр һәм Габбас Зиннәтуллинннар, Кайбыч мәгариф бүлеге начальнигы Илдар Шакиров, яшь чаңгычыларны сәламлап, аларга уңышлар теләделәр. Ярышта барлыгы җиде команда катнашты. Кошман, Федоровское, Борындык, Ис­ке Чәчкаб, Олы Кайбыч мәктәпләре үзләренең командаларын куйды. Шу­ны да әйтеп үтәргә кирәк, Кошман, Федоровское, Олы Кайбыч командалары бу ярышларда ел са­ен катнаша. Димәк, әлеге мәктәп­ләрнең тренерлары яшь буынны кечке­нә­дән үк чаңгы спорты бе­лән кызыксындыра алган.

Старт бирелде. Җилдәй җи­тез егетләр алга ыргылды. Малайларга өч, кызларга ике чакрым булган дистанция бик күп борылышлар, тауга ме­нү­ләр, җитез генә төшү­ләр, тигез җирдән иркен ысул белән чабуларга бай иде. Борындык мәк­тәбе тренеры Хәмзә Юнысов әйтүенчә, трасса бик үзенчәлекле һәм кызыклы.

Ярыш башында ук беренчелек урсаклылар кулында булды. Икенче, өченче урыннар өчен кө­рәш киеренке барды, нә­тиҗәдә борындыклылар икенче, Федоровскоедан Юрий Григорьев шәкертләре өченче булды.

Әйе, командасы составында Илнар Абдуллин, Чулпан Зиннәтуллина, Рөстәм Зәйнуллин, Исламия Кәримова, Дамир Хәсәнов, Эльвина Зәй­нуллина булган Зур Урсак командасына тиңнәр булмады. Алар көндәш­ләрен бер түгәрәккә калдырып, беренче урынны яулады. Бу ярышта Зиннәтуллин Габделхәй абыйның оныгы Чулпан Зиннәтуллина да катнашты. 2004 елгы булуына карамастан, үзенең чаңгы спорты белән дус булуын күрсәтте.

Ярышта катнашкан бер генә спортчы да бүләксез кайтып китмәде. Җиңүче командалар күчмә кубок, медальләр, кыйммәтле бүләкләр белән бүләк­ләнде. Аларның тренерларына да бүләкләр тапшырылды.

Дистанциядән килгән чаң­гычыларны кайнар чәй, коймак, печенье, конфет белән сыйлап тордылар. Гомәр Габделхәй улы киләсе биш еллык юбилей елында катнашучы командалар күбрәк булсын иде дигән теләген белдерде. Районыбызда зур мәктәп­ләрдән саналган Иске Тәрбит, Мәлки, Зур Подберезье, Чүти, Хуҗа Хә­сән мәктәпләре командасын шушы ярышта киләсе елларда күрәсебез килә.

Ярышларны оештырган, анда катнашкан, командалар өчен җан аткан һәр кешегә зур рәхмәт әйтәсе килә, тормышларында һәм эшләрендә зурдан-зур уңышлар теләп калабыз.