«Кайбыч таңнары» журналисты: «Үземне сәер бер халәттә тоттым»

Әниемнең туган авылы Олы Бакырчыдан үзебезнең авылгача тәпиләп җиде чакырым юл узасы бар. Юлыбыздагы авылларны узган саен, тагын күпме барасы калды, дип сорап куйгач, миңа рәхәт булып китә, әнием кулыннан ычкынып сикергәләп куям. Ә әнием җырлый башлый. Ничектер бик моңсу итеп, үзе өчен генә җырлый ул. Хәзерге, инде зур үскән акылым белән аңлыйм: кеше алдында гомер авыз ачып җырламаган әнием, әткәсе белән әнкәсе өеннән ераклашкач, кыр юлында сагыну җырын сузган! "Су буенда учак яна, кем кабызган ул учакны..."

...Беркөнне урамда, нәни кызымны чанасында этеп йөргәндә үземне сәер бер халәттә тоттым. Кеше алдында гомер авыз ачып җырламаган мин, инде урам башыннан ук шыпырт кына әнием җырын көйләп киләм икән. Ә уйларым белән бала чагым узган урамнарда, су буенда, кыр юлында икәнмен...